الخميس، 15 مايو 2014
الأربعاء، 14 مايو 2014
الجمعة، 9 مايو 2014
تاج الجزيرة .... الأبنودي .
الشفة عيرة
والصدر عيرة
حتي الحواجب.. حتي الضفيرة
والتوب ماهوش مغطي الجبيرة
طلعتي من عندنا بريئة
مسافة الحُول بقيتي سيرة
إنتي انحرفتي
واحنا انجرفنا..
والاَّ احنا وانتي خيبة كبيرة!؟
ومِن عَجزْنا
فسد خبيزنا
والا فسادك كان في الخميرة.؟
وكنتي بكر
يحميكي فكر
سُمعة وذكر
ربي ابتلاكي بعيوب مريرة
سبتي اللي راحوا شهدا عيونك
واللي شافوكي دايما أميرة
وزحفتي خلف اللي كل شوقهم
ياخدوا نصيبهم من الفطيرة
وبِعْدوا بيكي
عن اللي ليكي
اتْغَرَّبِت في الخُطي المسيرة
لا كانوا أهلك ولا هم ناسك
الناب يمصمص والضفر ماسك
جراد.. وكوش علي ميراثك
عميان.. وفاكرينك الضريرة.
الشفة ناشفة والصبر مالح
لبس اللي طالح
وش اللي صالح
ولعبوا بيكي أهل المصالح
علي ماصحيتي
وقلتي بيتي
ما فضلش في الغيط غير القوالح.
أهل القبيلة وأهل العشيرة
سنة غبية سودا مريرة
ضلمة ومتاهة
طفُّوا ضياها
أهل الشراهة
يادي السما اللي ليلنا غَشَاها
كنا ف حقيقة والا اشتباهة.؟
والا انعكاسةُ روحنا الفقيرة.؟
وإنتي شايفانا حْرنا دِرنا
يارب إِحنا دول والا غيرنا.؟
ريح سودا فلقت باب الحظيرة
وعباد عويلة
لحي طويلة
خدوا منَّها فكرة الفتيلة
واتباوسوا في المعزي ع القتيلة
سعدا لقتلك باتوا فَرَاحَي
شمتوا وحسوا يومها براحة
وقعدنا إِحنا يا اهل البصيرة
نفطر تعاسة ونتغدي حيرة
كله ما حوّق
والطوق يطوّق
يومها انفلت مننا صباحنا
ودخلنا بيكي لعبة عسيرة
مُهرة أصيلة تسابْقِي ضلك
لقيتي نفسك طالعة الأخيرة
يومها ف ميدان الثورة اتنشلنا
وانتي لبستي (تاج الجزيرة)
الاشتراك في:
الرسائل (Atom)